ذكاء مبارك أم قلة حيلة محمد مرسي

تصفية الحسابات

مبارك لما اتخلع كان بيرسم خارطة طريق لحفظ ماء وجهه حتى لو اتسجن ويكشف بيه الوجه الحقيقي للاخوان امام الشعب

نظام مبارك وصلنا في الإنتخابات إننا نكون أمام اختيارين احلاهما مر ، اما نختار (شفيق) عشان نعيد النظام القديم اللي ثورنا عليه ، أو نختار (مرسي) الجماعة اللي طول عمرها نفسها توصل للحكم وكانت في السجون طول عمرها ومعاها تعاطف الناس

عشان مبارك عارف طمع الاخوان في السلطة وقلة خبرتهم في الإدارة السياسية، وصلنا للنتيجة دي

النتيجة دي هتخلينا نعصر اللمون ونختار مرسي حتى لو مبنحبش الاخوان ودا طبعا كرها في النظام اللي ثورنا عليه

وموازي ليه ان الجماعة مستعده تعمل اي حاجة عشان توصل للكرسي ودا (غشم) بكل أسف لأنهم لو كانوا عاوزين يفرضوا نفسهم بذكاء على المصريين كانوا اكتفوا بالبرلمان بس كجزء من المشاركة السياسية لعدم خبرتهم في إدارة الدولة لحد ما يكتسبوا الخبرة الكافية اللي تأهلهم للقيادة

ولكن هم طمعانيين في كل شئ ، ودا اكتر شئ كان مذاكره مبارك ، وعشان كده قدملهم كل التسهيلات اللي توصلهم للحكم ، ودا لأنه متأكد ان اي حد غير شفيق اترشح قصاد مرسي كان هيكسب بجدارة ، لكنه اختار شفيق بالذات ووصله للمرحلة دي عشان الناس تختار مرسي

نرجع لغشم الإخوان اللي لقوا نفسهم قيادات للدولة وهم مفيش عندهم أي خبرات للقيادة لأنهم طول عمرهم معارضين وما أسهل انك تعارض وتناكف في الحكومة لكن لما تبقى مسئول لازم تتحمل الشعب اللي هيقفلك على الواحدة ويطلب منك اللي مكنش بيشوفه من مبارك ومش هيصبر عليك زي ما كان بيصبر أيام مبارك

وبما انهم ملهمش أي خبرة ومقدروش يحققوا اي شئ ملموس ، حاولوا يستخدموا نفس اسلوب مبارك بتاع الكذب المبرر وإلصاق أي مصيبه بتحصل بأي معارض عشان يرموا الأحمال عليهم انهم السبب في الأزمات

وطبعا لأن الكذب السياسي (فن) وهم مش أساتذة كذب سياسي لحداثة عهدهم في السلطة فكذبهم بيكون واضح جدا ومفضوح والشعب بيفقسهم بسرعه

دا اللي خلى الشعب يزيد سخطه على الاخوان وخلى مبارك يبان انه على اد ما كان فاسد بس معملش اللي عمله الاخوان ويخلي الشعب يتمنى يوم من أيامه

المشكلة كمان ان الإخوان وصل عندهم شكوك بشكل مش طبيعي ووصلوا للرئيس الاحساس دا ان (كل أعوانك يخونوك ياريتشارد) سواء القضاء أو الداخلية أو الإعلام ، وحتى الحكومة اللي هم معيننها بدأو يشكوا فيها ، وحتى مستشاريين الرئيس المستقيلين واللي هو كان عينهم شك فيهم ، حتى الجنزوري اللي الرئيس شاف ان كان شايل البلد ايام المجلس العسكري بعد ما مسك الرئاسة ورفض طلب الاخوان باسقاطه ايام حكم المشير وابقى عليه 3 شهور كامله ، رفض دلوقتي مجرد انه يستعين بيه بالرغم من انه مستشاره ، البلد بقت على المحك ونسبة الشك وانعدام الثقة من الجماعة لكل الفصائل السياسية بقت واضحه للجميع

أصبح الاخوان دلوقتي شغلهم الشاغل يمرروا الدستور اللي مفصلينه على مقاسهم عشان يخدمهم زي ما كان بيخدم مبارك لما كان بيفصل دستوره على مقاس الحزب الوطني ، ودا اللي خلى الناس كلها مستغربه من وضع الدستور اللي بيتم تمريره بأي شكل وبأي أسلوب حتى لو كان النتيجة فيها دم يسال وارواح تذهق لكن اهم شئ انه يمر ويصبح معاهم شرعية دستورية من الشعب بالتزوير او غيره المهم انهم يحصلوا عليها

وبقينا دلوقتي في مرحلة إنعدام ثقة من الرئيس وجماعته لكل اللي تحتهم ويبصوا لأي حد بينتقدهم إنه عدوهم

في النهاية نستنتج إننا امام تصفية حسابات المطحون الوحيد فيها هو الشعب المصري المسكين … بس مهما حصل عمرنا ما هنقول يوم من أيامك يامبارك ، ويسقط يسقط حكم المرشد